Éxito de participación no I Congreso Internacional de Aprendizaxe-Servizo en contornos dixitais que acolle a UNED de Lugo ata o 27 de xuño
A UNED de Lugo converteuse dende onte no epicentro internacional do debate académico arredor da metodoloxía de Aprendizaxe-Servizo (ApS), coa celebración do I Congreso Internacional sobre Aprendizaxe-Servizo en contornos dixitais: innovación e compromiso na universidade do século XXI. A cita, que se prolongará ata o venres 27 de xuño, reúne a especialistas de sete países e celébrase en formato híbrido, cunha destacada participación presencial e en liña.
O acto inaugural contou coa presenza institucional das vicerreitoras de Innovación Educativa e de Internacionalización e Multilingüismo da UNED, da decana da Facultade de Dereito, da directora do Centro Asociado de Lugo e da presidenta do comité organizador, a profesora Miryam C. González Rabanal.
Este congreso, pioneiro no seu enfoque, reflexiona sobre o potencial transformador da metodoloxía ApS, que une aprendizaxe académica e compromiso social, con especial atención á súa aplicación en contornos dixitais.
Ao longo das sesións estanse a tratar cuestións clave como:
-
O deseño e avaliación de proxectos de ApS dixitais con impacto real na comunidade.
-
A implicación activa do estudantado como motor de cambio.
-
A colaboración entre universidades, administracións públicas e entidades sociais.
-
Os retos éticos do uso de ferramentas dixitais e intelixencia artificial no ApS.
-
O papel do ApS como vía para avanzar nos Obxectivos de Desenvolvemento Sostible (ODS) dende a educación superior.
Organizado dende o Centro Asociado da UNED en Lugo, o evento conta coa colaboración do Grupo de Innovación Docente GID 2016/16, do Departamento de Economía Aplicada e Xestión Pública, dos vicerreitorados mencionados e co apoio institucional do Concello de Lugo e da Deputación de Lugo.
As actividades continúan ata o xoves cun programa que inclúe relatorios, presentacións de boas prácticas e espazos de debate inclusivo e crítico, reafirmando o compromiso da UNED cunha universidade socialmente responsable, dixital e transformadora.
📌 Máis información e inscricións:
https://extension.uned.es/actividad/44887&codigo=CIAEE
Sesión inaugural contou coa presenza institucional das vicerreitoras de Innovación Educativa e de Internacionalización e Multilingüismo da UNED, da decana da Facultade de Dereito, da directora do Centro Asociado de Lugo e da presidenta do comité organizador, a profesora Miryam C. González Rabanal.