Arrincan as titorías do novo curso na UNED de Lugo

O inicio das titorías marca o comezo oficial do curso académico na UNED de Lugo, onde o profesorado titor, experto en cada materia, acompaña os estudantes ao longo dos seus estudos de Grao. Ademais, invítase ao alumnado a utilizar a Sala de Estudo da Biblioteca, aberta 12 horas ao día, de luns a venres. O período de matrícula segue aberto ata o 22 de outubro.

Co arranque das titorías, a UNED de Lugo lembra á súa comunidade estudantil a importancia de aproveitar este servizo académico. As titorías son guiadas polo profesorado titor, unha figura clave no modelo de ensino da UNED, que se coordina estreitamente co equipo docente das Facultades e Escolas para proporcionar unha atención personalizada e facer un seguimento continuo dos estudantes ao longo do curso.

As titorías poden ser presenciais ou a través de videoconferencia, xa sexan semanais ou quincenais, dependendo da materia. Na actualidade, a UNED de Lugo conta con sistemas avanzados de videoconferencia e pizarras dixitais interactivas (aulas AVIP), o que permite impartir titorías en tempo real a varios centros ao mesmo tempo, optimizando recursos e ampliando o acceso aos estudantes.

Entre as funcións principais dos profesores-titores atópanse:

• Orientar aos estudantes na preparación das materias e resolver dúbidas sobre os contidos.
• Supervisar e cualificar as prácticas daquelas materias que o requiran.
• Corrixir e explicar as probas de avaliación continua.
• Informar ao equipo docente sobre o progreso e nivel de preparación dos estudantes.
• Orientar aos alumnos para as probas presenciais.
• Participar activamente no seguimento do curso virtual.

Os estudantes poden interactuar cos seus titores tanto en persoa no Centro Asociado de Lugo como a través dos foros virtuais das titorías. Esta figura é esencial no éxito do modelo de formación semipresencial que caracteriza á UNED.

A selección dos profesores-titores realízase mediante un concurso público baseado en criterios de mérito e capacidade, garantindo que todos eles estean altamente cualificados nas súas respectivas áreas de coñecemento.

Sala de estudo

A UNED de Lugo tamén ofrece un espazo adecuado para o estudo individual na súa Sala de Lectura, situada xunto á Biblioteca. Este espazo, que se mantén en silencio para facilitar a concentración, dispón de conexión wifi e está aberto de luns a venres, de 9:00 a 21:00 horas. Tanto estudantes da UNED como opositores poden facer uso desta sala, e os alumnos da UNED teñen acceso directo á Biblioteca para consultar os materiais necesarios para as súas sesións de estudo.

A directora da UNED de Lugo, Ana Belén Traseira Pena, anima aos/ás estudantes a facer uso destes servizos, subliñando a importancia de aproveitar as instalacións e recursos que ofrece o centro: “Queremos que os/as estudantes se sintan apoiados/as e poidan beneficiarse dun ambiente académico dinámico e accesible para todos”.

Por último, lémbrase que o prazo de matrícula para o curso académico 2024-2025 estará aberto ata o 22 de outubro.