A UNED de Lugo imparte unha conferencia sobre bulos climáticos no IES Lucus Augusti
A UNED de Lugo desenvolveu no IES Lucus Augusti unha nova actividade de divulgación ambiental dirixida ao alumnado de 1º de Bacharelato de Excelencia en Ciencias e Tecnoloxía.
Nesta ocasión, dez estudantes do programa STEMbach recibiron formación específica sobre desinformación climática a través dunha sesión impartida polos biólogos Paula Fernández Moure e Alejandro Rodríguez García, integrantes do proxecto #LugoNaturalMente, promovido pola UNED de Lugo.
A actividade centrouse na análise crítica dos bulos vinculados coa emerxencia climática, abordando tanto os mecanismos sociais e científicos que facilitan a súa propagación como os axentes que contribúen á súa difusión. O obxectivo principal foi proporcionar ao alumnado ferramentas prácticas para recoñecer e combater este tipo de desinformación.
Como lembranza da actividade e en consonancia co compromiso ambiental do proxecto, o estudantado recibiu bolsas de tea reutilizables con certificación ecolóxica GOTS.
Esta conferencia enmárcase na liña de acción da iniciativa de alfabetización climática impulsada pola UNED de Lugo, reflectindo, unha vez máis, o seu firme compromiso cos valores dos obxectivos de desenvolvemento sostible.
