Lugo convértese no epicentro do Campus Noroeste da UNED coa celebración da reunión do seu Consello Territorial
O Centro Asociado da UNED en Lugo acolle os días 24 e 25 de abril de 2025 a reunión do Consello do Campus Noroeste, converténdose nestas datas no epicentro da coordinación universitaria da UNED para este ámbito territorial.
O Campus Noroeste da UNED está integrado polos centros asociados das comunidades autónomas de Galicia, Asturias, Estremadura e Castela e León, e a reunión reunirá en Lugo a preto de 30 responsables académicos, incluíndo os directores e directoras dos centros que o compoñen, así como altos cargos da sede central da UNED, como o vicerreitor de Centros Asociados e a vicerreitora de Innovación Docente, entre outros membros do equipo de goberno da universidade.
A sesión formal do Consello celebrarase o xoves 24 pola tarde na sede da UNED Lugo, e continuará na mañá do venres 25, cun programa que inclúe visitas institucionais ao Concello de Lugo e á Deputación Provincial, e unha intensa xornada de traballo centrada na planificación do vindeiro curso académico.
Entre os temas que se abordarán destacan as novidades educativas previstas para o novo curso, a innovación e calidade docente, os programas de extensión universitaria e cultural, así como cuestións organizativas e económicas que afectan ao conxunto do campus.
A celebración deste encontro en Lugo reflicte o compromiso do Centro Asociado coa estrutura territorial da UNED e co avance dun ensino público, innovador e de calidade, sempre ao servizo do alumnado e do desenvolvemento territorial.
