A UNED de Lugo dá a benvida ao alumnado sénior e amosa a súa satisfacción pola gran acollida do programa

A directora da UNED de Lugo, Ana Belén Traseira Pena, deu a benvida ao alumnado sénior que inicia a súa formación no centro. Nesta primeira xornada, comezaron as clases da materia Informática, impartida por José Luis Somoza Amado, enxeñeiro informático.

Mañá será a quenda do alumnado da asignatura Comezando a coñecer a Historia da Arte, que estará a cargo de Raquel Iglesias, licenciada en Historia da Arte.

A UNED de Lugo amosa a súa satisfacción pola gran acollida que tiveron as materias da UNED Sénior neste curso, con todas as prazas cubertas en todas as asignaturas, agás en Historia da Arte, onde aínda é posible inscribirse. Ademais, en dúas semanas, os días 10 e 11 de marzo, incorporarase ás aulas o alumnado de Inglés Básico e Inglés Intermedio, coa profesora Cristina Pereira Pinto.

A directora da UNED de Lugo subliñou a importancia do envellecemento activo e o valor de manter sempre as ansias de aprender, destacando que a formación continua é clave para o benestar e o desenvolvemento persoal ao longo de toda a vida.