A UNED de Lugo e a Fundación Breogán visitan a Terra Chá co proxecto “Ningún Aro Sen Rede” promovendo a saúde e a sostibilidade
A UNED de Lugo, en colaboración coa Fundación Breogán e a empresa Ecoballution, levou o proxecto “Ningún Aro Sen Rede” aos colexios CEIP Plurilingüe de Xermade e CEIP Plurilingüe Lagostelle de Guitiriz. Esta iniciativa, que une deporte, reciclaxe e educación ambiental, ten como obxectivo principal contribuír ao desenvolvemento sostible a través da economía circular, a promoción e consumo responsables e a práctica do deporte como ferramenta para a saúde e o benestar da cidadanía.
O proxecto baséase na creación de redes de baloncesto artesanais e sostibles, elaboradas a partir de residuos de redes de pesca, grazas ao traballo de Ecoballution. Ademais de fomentar a reciclaxe, busca sensibilizar á comunidade escolar sobre a importancia da xestión responsable dos recursos e dos residuos, aliñándose cos Obxectivos de Desenvolvemento Sostible (ODS) da Axenda 2030.
Primeira parada en Xermade
A primeira visita realizouse no CEIP Plurilingüe de Xermade, onde o alumnado de Educación Infantil e Primaria participou activamente na xornada, guiada polo director da Fundación Breogán, Luis Abel, e o biólogo da UNED, Alejandro Rodríguez. A actividade contou coa presenza da mascota do Club Baloncesto Breogán, Maximus, que achegou diversión e entusiasmo ao evento. Durante a sesión, animouse ao alumnado a colaborar no proxecto mediante a reciclaxe de material de escritura.
Encontro en Guitiriz
A segunda parada tivo lugar no CEIP Lagostelle de Guitiriz, onde os estudantes de sexto curso de Educación Primaria tiveron a oportunidade de coñecer a Maximus e participar nunha xornada de aprendizaxe e xogos. Luis Abel e Alejandro Rodríguez explicaron o proceso de elaboración das redes de baloncesto e destacaron a importancia de promover a economía circular e a sostibilidade. A xornada culminou cunha competición deportiva na que tanto mestres como estudantes recibiron agasallos sostibles, reforzando os valores promovidos pola iniciativa.
Un proxecto con impacto sostible
“Ningún Aro Sen Rede” exemplifica a simbiose entre educación, deporte e sostibilidade. A través desta acción, a UNED de Lugo reafirma o seu compromiso co desenvolvemento sostible, promovendo hábitos saudables e prácticas responsables que contribúan á saúde e ao benestar da cidadanía, á vez que fomenta a economía circular e o reciclaxe como ferramentas clave para un futuro sostible.
