A UNED de Lugo ofrece un curso de iniciación á Lingua de signos

No curso Lingua de signos Nivel A1 poderemos iniciarnos na lingua de signos española.

As linguas de signos defínense, de acordo coa Lei 27/2007, como “linguas ou sistemas lingüísticos de carácter visual, espacial, xestual e manual en cuxa conformación interveñen factores históricos, culturais, lingüísticos e sociais, utilizadas tradicionalmente como linguas polas persoas xordas, con discapacidade auditiva e xordo-cegas” (artigo 4.a). É importante destacar nesta definición o carácter visual, espacial, xestual e manual das linguas de signos, o que as diferencian das linguas orais, xa que isto ten unhas implicacións tecnolóxicas que fan necesario o desenvolvemento dun deseño tecno-pedagóxico especialmente pensado para as linguas de signos. Por exemplo, a imposibilidade de empregar os tradicionais exercicios escritos dos cursos online de idiomas orais, posto que as linguas de signos son ágrafas.

Os cursos de lingua de signos española da Fundación CNSE promoven a máxima autonomía do alumnado na aprendizaxe, aproveitando as posibilidades multimedia, o poder da interactividade e a aprendizaxe por descubrimento.

Será impartido por docentes de Lingua de signos da Federación de Asociacións de Persoas Xordas de Galicia (FAXPG).

Realizarase online, do 13 de marzo ao 12 de maio. 

Máis información e matrícula:

https://extension.uned.es/actividad/29845&codigo=CLDSN