Entre NUBES e conciencia ambiental: o bacharelato artístico do CPR Fingoi visita a exposición de Iago Eireos na UNED de Lugo

Unha experiencia educativa que une arte contemporánea e ciencia para reflexionar sobre a paisaxe, a percepción e o cambio climático.

Desde o 24 de abril, o vestíbulo da terceira planta do Centro Asociado da UNED en Lugo acolle “Nubes”, unha exposición do artista Iago Eireos. A mostra, que explora a relación entre percepción, paisaxe e abstracción, serviu tamén como punto de encontro entre a arte, a educación e a divulgación científica.

Aproveitando o seu labor docente no Bacharelato Artístico do CPR Fingoi de Lugo, o propio Eireos organizou unha visita guiada á exposición co seu alumnado, facilitando así un achegamento directo ao seu proceso creativo e á interpretación das súas obras nun contexto académico.

A actividade integrouse no marco do Proxecto #LugoNaturalMente, unha iniciativa da UNED de Lugo que busca xerar conciencia ambiental a través de diversas disciplinas. Nesta ocasión, os biólogos Paula Moure e Alejandro Rodríguez, coordinadores do proxecto, ofreceron unha introdución científica á exposición. Na súa intervención explicaron como o modelo de produción industrial contribúe á desaparición de nubes e ao agravamento do cambio climático, establecendo un interesante paralelismo entre a ciencia e a poética visual da obra.

“Nubes” parte dunha reflexión sobre a expresión “estar nas nubes”, comunmente asociada coa fantasía ou a desconexión da realidade. Para Eireos, esta frase remite tamén á pareidolia –a capacidade de atopar formas familiares no abstracto– e a unha invitación a mirar máis aló do evidente. A exposición desprega un conxunto de obras nas que se combinan técnicas como a pintura, o gravado, o stencil e a instalación, propondo ao espectador unha inmersión en paisaxes deconstruídos, recordos e formas en constante transformación.

Con esta iniciativa, a UNED de Lugo reforza o seu compromiso coa cultura contemporánea, a educación artística e a sensibilización ambiental, ofrecendo ao público unha proposta innovadora que une reflexión estética e pensamento crítico.