A UNED de Lugo participa na “Xornada de boas prácticas en bibliotecas de centros asociados”
A UNED Lugo participou o pasado 7 de novembro na Xornada de Boas Prácticas en Bibliotecas de Centros Asociados organizada polo Vicerreitorado. Ao encontro asistiron máis de oitenta persoas entre directores, coordinadores de extensión universitaria e persoal de bibliotecas. O obxectivo desta actividade foi compartir as iniciativas e a experiencia de cinco bibliotecas co fin de revitalizar outras que, por diversos motivos, aínda non puideron desenvolver do todo o seu potencial.
Abordáronse diversos temas desde os clubs de lectura, o expurgo, a colaboración con proxectos como o vinculado cos Obxectivos de Desenvolvemento Sostible, ata o seguimento da axenda cultural, e os avances na difusión de novidades editoriais, noticias de actualidade, actividades e servizos bibliotecarios.
O acto foi presentado polo vicerreitor de Centros Asociados, Jesús de Andrés, e a directora da biblioteca da UNED, Isabel Calzas. Interviñeron Ana Ubé, Pilar González, María Alfonso, Concha Soler e Leticia Merino, bibliotecarias dos Centros de Teruel, Cantabria, Lugo, Valencia e Pamplona respectivamente.
Baixo o título “Bibliotecas que deixan pegada” a UNED Lugo mostrou algunhas das actividades que se desenvolven desde o servizo de biblioteca colaborando co Proxecto Lugo Naturalmente.
